يېزىشنى تاللىدىم

بەزىلەر ئۆلسىمۇ ياشاۋاتقاندەك، يەنە بەزىلەر ياشاۋاتسىمۇ ئۆلگەندەك دۇنيا بۇ !!!  ئۆلسەكمۇ ياشايدىغان ھاياتنى ياشاش نەقەدەر كاتتا  نىھمەت   !؟

ھاياتىمىزدىن بەك داغدۇغلىق ئىزلارنى قالدۇرالمىساقمۇ، ئۆزىمىزگە خاس ھاياتلىق يولىمىز قالسۇن.

شۇنداق قىلىپ يېزىش مىنى تاللىدىمۇ ئېيتاۋۇر مەن ئۇنى… يېزىپ قالدىم. يازغانلىرىمنى دوستلار بىلەن ئورتاقلىشىشنى خالاپمۇ  قالدىم.

***

Son of the Moon / Hijo de la Luna

***

« ھايات سەپىرىڭ ئۇزۇن، سەن يازغىىن »  دەپ ماڭا بىشارەت بەرگەن چۈشۈمدىكى ھىلىقى ئۇزۇن، ئاق ساقاللىق بوۋايدىن  ئىلھام ئېلىپ يازدىم.

شۇنداق بېرى بار… ئۇ شۇنچىلىك جەلىپكار ھەم شۇنچىلىك نۇرلۇق، شۇنچىلىك كۈچلۈك ھەم شۇنچىلىك دانا… ئۇ كۆپىنچە سۈبىھىلەردە ياكى يېرىم كېچىلەردە قەلبمگە شىۋىرلايدۇ… بۇ شىۋىرلاشلارنى بەزىلەردە قەلبىمنىڭ كۈندىلىك خاتىرىسىگە، بەزىلەردە خاتىرەمنىڭ بەتلىرىگە… يەنە بەزىلەردە تېلىڧۇنۇمغىلا يازدىم.

يازغانلىرىم 2013-يىلى ئەدەبىيات نوبىل مۇكاپاتىغا ئېرىشكەن كانادالىق ئايال يازغۇچى ئەلىس مونرو نىڭ ئەسەرلىرىدەك دۇنياۋى شۆھرەتكە ئېرىشەلمىسمۇ يازدىم.

مەقسىتىم ئەلۋەتتە شۆھرەت ئەمەس. پەقەت يېزىش ئارقىلىق خۇشاللىق ھەم مەلۇم دەرىجىدە ئۆزۈمدىن قانائەتكە ئېرىشەلەيدىغانلىقىم، يەنە ھەم ھەشەمسىز  بىراق، قەلبىمدىكى قۇرلارنىڭ ئۆزۈمدىن ھالقىپ يەنە بەلكىم  بەزىلەرگىمۇ ئىلھام ھەم كۈچ بولىدىغانلىقى ئۈچۈن يازدىم.

***

تەقدىرنىڭ ھەر بىر قىسمىتىدە بىر ھىكىمەت دەپ ئۆزۈمنىڭ نىمە ئۈچۈن يىلتىزىم بار يەردە ياشاشتىن، مىھرىبان ئانام، مەردانە دادام، خۇشچاقچاق، بىر يەرگە كەلسەك دوستلاردەك بولۇپ كېتىدىغان قېرىنداشلىرىم بار يەردە ئۇلار بىلەن جەم بولۇپ ياشىغاندىكى گۈزەل رىسىقتىن، تۇنجى ئايىقىم، تىلىم چىققان، تۇنجى سۆيگۈمنىڭ مەسۇم خاتىرىلىرى قالغان زېمىنىمدا ياشاشتىن يىراقلىقىمىدن مۇڭلىنىپ قالغانلىرىمدا شۇنداق ئويلاپ قالاتتىم…

تەڭرى مېنى ئۆز قەلبىگە تېخىمۇ يېقىنلاشسۇن، قەلبىنى تاشقى زەربىلەردىن ساقلىيالايدىغان ھەم بەزىدە ئاۋايلاپ تۇرۇپ ھىچكىم تاپالمايدىغان يەرگە يوشۇرۇپ قويالايدىغان، پۈتۈن دۇنيا ئۇنتۇپ قالغاندىمۇ ئۆزىنى يوقىتىپ قويمايدىغان ئۆزىنى سۆيۈش ئىقتىدارىنى يىتىلدۈرسۇن، ھاياتىدىكى كىچىككىنە ئىشلاردىن، ھەتتا، ياۋا گۈللەردىنمۇ گۈزەللىك، خۇشاللىق ھەم ھىكىمەت تاپالايدىغان ھەم بۇ ھىكىمەتلىرىنى يېزىشتىن قەلبى ئارام تاپسۇن دەپ بۈگۈنكى قىسمەتنى بەرگەن بولىشى مۇمكىن دەپ ئۆزۈمگە تەسەللىي بېرىپ تۇرۇپ يازدىم.

***

رەيھان ئابلەت

   2017.03.07

****************************************

  بىلوگىمنىڭ  قۇرۇلغانلىقىغا مۇبارەك !!!

تۇنجى قېتىملىق يازمامنى بۇرۇن يېزىپ قويغان، ھىچكىم تېخى ئوقۇشقا نىسىپ بولمىغان ئۇشبۇ قۇرلار بىلەن باشلىدىم. بۈگۈندىن باشلاپ ئەسرالىشىپ تۇرارمىز   ~

يېڭى ئوي-پىكىرلەر تۇغۇلۇپ تۇرىدىغان ھەر كۈنىمىزدە  بايقاپ باقمىغان ئۆزىمىزنى بايقاش ھەم سىزنى بايقاش نىسپ بولغاي ~~