ياپون پەرزەنت تەربىيەسى: بالىڭىز گېپىڭىزنى بىر قېتىمدا ئاڭلىمايدۇ، شۇنداقمۇ؟

2,381 قېتىم ئوقۇلدى

بالىڭىزغا ئەڭ كۆپ دەيدىغان گېپىڭىزدىن بىرى، «گەپ قىلغاندىكىن بىر قېتىمدا ئاڭلىساڭ بولمامدۇ، ياغاچ قۇلاق؟!» شۇنداقمۇ؟

يالغۇز بىر سىزنىڭ بالىڭىز مۇشۇنداق «ياغاچ قۇلاق» مۇ ياكى بالىلارنىڭ ھەممىسى مۇشۇنداق بولامدۇ؟

 

 Big Hero 6 – all Out Boy

 

بالا دىگىنىمىز شۇنچە دىسەكمۇ ئوخشاش خاتالىقنى ئۆتكۈزىۋىرىدىغان مەخلۇق

ھەممىمىز بالىمىزغا دېگەن گېپىمىزنىڭ بىر قېتىمدىلا تەسىركۆرسىتىشىنى، ئوخشاش گەپنى قانچە – قانچە قېتىملاپ دەۋىرىشنى خالىمايمىز،- ئەلۋەتتە!

ھالبۇكى، بالا دىمەك قانچە قېتىملاپ ئېيتىپ تۇرساقمۇ ئوخشاش خاتالىقنى قىلىۋىرىدىغان مەخلۇق! شۇڭا، ئوخشاش گەپنى تەكرارلىماقتىن باشقا ئامالىمىز يوقتەك!

بۇ ھەرگىزمۇ ئاتا – ئانىنىڭ گەپ قىلىش ئۇسۇلىدىكى مەسىلە ۋە ياكى بالىنىڭ بەكلا ناچار، ئەسكى بالا بولغانلىقىدىن بولماستىن، بالا دېگىنىمىز ئەسلى ماھىيتىدىن ئاشۇنداق بولغىنىدىن.

گەپ قىلسا بىر قېتىمدىلا ئاڭلاش دېگىنىمىز چوڭلارغا قارىتىلغان. تېخى چوڭلارمۇ خاتالىقىنى بىر قېتىملىق ئەسكەرتىش بىلەنلا تۈزىتىپ بولالمايدىغۇ بەزىدە؟! (شۇنىڭغا قارىغاندا بالىلىرىمىزغا كۆپىنچە ۋاقىتلاردا بەك يۇقىرى تەلەپ قويۇپ ئۇۋال قىپ قويامدۇق – قانداق؟)

بالىنى بىر قېتىمدىلا گەپكە كىرگۈزىمىز دىسەك، بالىنىڭ يۈرىكىنى راۋۇرۇس بىر مۇجۇپ قويۇشقا توغرا كېلىدۇ، لېكىن،  بۇ خىل قورقۇتۇپ گەپ ئاڭلىتىشنىڭ زادى زۆرۈرىيتى بارمىدۇ؟ ئاشۇنداق قىلساق  ھەقىقەتەن گىپىمىزنى ئاڭلارمۇ زادى؟ بۇ بىر مەسلە.

يەنى، بۇ خىل ئەھۋالدا بىلىپ – بىلمەي ئاۋازىمىزمۇ يۇقىرى چىقىپ كېتىدۇ، قولىمىزمۇ تىگىپ كېتىشى مۇمكىن.

بۇنداق گەپ ئاڭلىتىش تەكرارلىنىۋەرگەندە، بالىنىڭ قائىدىلىك، ئەدەبلىك بالا بولۇشى دىگەنلەر ئۆزلىكىدىن ئەمەس، ئاتا – ئانىنىڭ چىرايىغا قاراپ تۇرۇپ بولىدۇ. يامان يېرى بالىنىڭ قەلبىدە ئېغىر جاراھەتلەر قالىدۇ…

قىسقىسى، پەرزەنت تەربىيەسىدە بىر قېتىمدىلا بالىغا گەپ ئاڭلىتىمەن دىگەن ئويدىن  ۋاز كېچىشكە، يەنىلا ئوخشاش گەپنى قايتا – قايتىلاپ ئېيتىپ تۇرىشىمىزغا توغرا كېلىدۇ، بالىمۇ مۇشۇ جەرياندا ئاستا – ئاستا ئۆسۈپ يېتىلىدۇ.

 

بىر قېتىمدىلا گەپ ئاڭلىتىمەن دىسەك

دادىسى : ئويۇنۇڭنى ئويناپ بولغاندىن كىيىن ئويۇنچۇقلىرىڭنى يىغىشتۇرىسەن دەپ قانچە قېتىملاپ ئېيتتىمغۇ ساڭا!، – دەپ ئاچچىقلايدۇ ئويۇنچۇقلىرىنى ئويناپ بولۇپ يۇغۇشتۇرمىغان ئوغلىغا.

ئۇف… ھەر كۈنى ئوخشاش گەپنى قىلدۇرىۋەرگەن… جاق تويدۇم، – دىدى دادا قانچە قېتىملاپ گەپ قىلسىمۇ ئاڭلىمايدىغان ياغاچ قۇلاق ئوغلىنىڭ ئويۇنچۇقلىرىنى رەتلەۋېتىپ.

ئۈچ سائەتتىن كىيىن دادا ئوغلىنىڭ ئۆيىگە كىرىپ ئۆيىنىڭ يەنە قالايمىقان چېچىلغان ئويۇنچۇقلار بىلەن ۋەيرانە تۇرغان ھالىتىنى كۆرۈپ ئەرۋاھى قىرىق گەز ئۆرلىدى.

ساڭا بايىلا دىگەنىدىمغۇ تېخى! يەنە نىمە قالايمىقانچىلىق بۇ؟! قانچە قېتىملاپ ئوخشاش گەپنى دىگۈزىۋىرەمسەن؟ سەن گۇينىزە…، – دەپ قايناپلا كەتتى بۇ قېتىم ئۆزىنى بېسىۋالالمىغان دادا.

مۇشۇ خىل ئەھۋالدا بۇ دادا قانداق پوزىتسىيەدە بولسا بولاتتى؟

 

زىرىكمەي – تىرىكمەي گەپنى تەكرار قىلىش،  بالىغا ئاز – ئازدىن ئۈگىتىش

دادىسى : ئويۇنۇڭنى ئويناپ بولغاندىن كىيىن ئويۇنچۇقلىرىڭنى يىغىشتۇرىسەن دەپ قانچە قىتىملاپ ئېيتتىمغۇ ساڭا !، – دىدى ئويۇنچۇقلىرىنى ئويناپ بولۇپ يۇغۇشتۇرمىغان ئوغلىغا.

مەنمۇ ساڭا يۇغۇشتۇرۇشۇپ بېرەي، كېلە، بىللە يۇغۇشتۇرايلى ، – دىدى ھەم بالا بىلەن بىللە رەتلەشكە باشلىدى.

ئۈچ سائەتتىن كىيىن دادا ئوغلىنىڭ ئۆيىگە كىرىپ ئۆيىنىڭ يەنە قالايمىقان چېچىلغان ئويۇنچۇقلار بىلەن ۋەيرانە تۇرغان ھالىتىنى كۆرۈپ، – يەنە شۇنداق قالايمىقان قىلىۋېتىپسەنغۇ؟! يۇغۇشتۇرايلى!، – دەپ ئويۇنچۇقلارنى ئوغلى بىلەن بىللە يۇغۇشتۇردى ھەم رەتلىك، چىرايلىق ئۆينى كۆرسىتىپ تۇرۇپ، – قارا، مۇنداق موھىتتا ئۆزۈڭمۇ خۇش بوپ قالىسەن ئەمەسمۇ ؟!- دىدى.

***

كىيىنكى مىسالدىكىدەك مۇئامىلە قىلماق ئاسان ئەمەس، شۇنداقمۇ؟ بىراق، ئاتا – ئانا بولۇش – سەۋرىچانلىقنى ئۈگىنىش، كەيپىياتنى تىزگىنلەشنى مەشىق قىلىش، ئاخىرىدا ئادىمىيلىكنى ئۈگىنىش دىمەكلىكتۇر. داۋاملىق دەپ تۇرغىنىمىزدەك بىز بالىلارنى، بالىلار بىزنى تەربىيلەپ ماڭىدۇ.

***

دادام ئاشۇنداق ئادەم ئىدى. ئوخشاش گەپنى توختىماي تەكرارلاپ تۇراتتى، نەسىھەتلىرى ئۈزۈلمەيتتى، تەكرارلىنىپ تۇراتتى… ئۆز ۋاقتىدا دادامنىڭ بۇ «كوت – كوت» لىقىدىن غۇدۇرايتتۇق… مانا بۈگۈنگە كەلگەندە دادامنىڭ ھەر بىر كوت –كوت سۆزلىرىنىڭ بىر ھېكىمەت ئىكەنلىكىنى يۈرىكىمىزدىن ھېس قىلىپ تۇرۇپتۇق، بىزنى مۇشۇنچىلىك ئەقىل ھەم قەلىبتە تەربىيەلەپ چىقالىغان ئاتا – ئانلىرىمىزغا مىننەتدارلىقىمىز بولسۇن.

ベイマックス

ھىسياتسىز، مۇزدەك ئادەملەرنى ماشىنا ئادەمگە ئوخشاتماڭ، ماشىنا ئادەملەردىمۇ ھىسيات بار مۇنداق!

دىسنىنىڭ 2014 – يىلى ئىشلىگەن فانتازىيەلىك كارتۇن فىلىمى «بۈيۈك قەھرىمان 6»، بالىلار كۆرمىسە ئارماندا قالىدىغان كارتۇن فىلىم، مەزمۇنىنى سۆزلەپ گەپ ئۇزارتمىساممۇ بولار ھە!🤓

ياپونچىسى: ベイマックス
ئىنگىلىزچىسى :  Big Hero 6

ベイマックス

 

 

**************************

「 大好き! が伝わるほめ方&叱り方 」

ـ ناملىق كىتابتىن تەرجىمە قىلىندى

تەرجىمىدە رەيھان ئابلەت

 

تارقىتىڭ...
  1. كىتابنىڭ تەرجىمىسى بارمۇ ؟ سېتىۋالغىلى بۇلارمۇ ؟ ئەجرىڭىزگە رەھمەت

  2. ياخشىمۇسىز ؟ دىگىنىڭىز ئۇيغۇر تىلىدىكى كىتابى بولسا ، تېخىچە يوق.
    باشقا تىللارنى كۆزدە تۇتقان بولسىڭىز
    明橋大二(Ake hashi daiji)
    دىگەن ئاپتۇرنىڭ ئىسمى ھەم يازمىنىڭ ئاخىرىدىكى كىتاب نامى بىلەن توردىن ئىزدەپ بىقىشىڭىزنى تەۋسىيە قىلىمەن. ☕️

ئىنكاس يازىمەن

ئەسكەرتىش: ئىنكاسىڭىزنى باشقۇرغۇچى تەستىقلىغاندىن كېيىن ئىكراندا كۆرۈنىدۇ.

ياپون

باش بەتكە قايتىمەن

© 2019 توكيو خاتىرىلىرى