بەزى ھاللاردا ئۇنتۇپ كېتىشكە تېگىشلىك كارتىنىلارنى قەلبىمىزنىڭ كامېراسىدا رەسىمگە تارتىۋىلىپ، قەلبىمىزنى جاراھەتلەندۈرىۋالىمىز ۋە ياكى يارىلىرىمىزنى قوچۇپ قالىمىز.
غەزەبلەنگەن ئۆزىمىزنى، ئۇۋالچىلىققا ئۇچىرىغان مىنۇتلىرىمىزنى«چىرىس» قىلىپ سۈرەتكە تارتىۋالىمىزدە، ئۆزىمىزنىڭ شۇنچە بەخىتلىك كەچمىشلىرى ئىچىدىكى شۇ بىر پارچە سۈرەتكە ئېسىلىۋىلىپ، ئۆزىمىزنى «بەختسىز»گە چىقىرىپ شىكايەت قىلىپ قالىمىز.
تۇرمۇشتا ئەستە تۇتۇشقا تېگشلىك دەقىقىلەر، شۇنداقلا ئەڭ ياخشىسى سۈرەتكە تارتىمىغان تۈزۈك بولغان كارتىنىلارمۇ بار.
خوگېن ناتورىنىڭ«پەرۋا قىلماسلىق ئادىتى»ناملىق كىتابى دەل بىزگە ئۇنتۇشقا تېگىشلىك شۇ كارتىنىلارنى قەلب كامىرايىمىزدا سۈرەتكە تارتىۋالماسلىققا، ئەستە تۇتۇشقا تېگىشلىك دەقىقلىرىمىزنى قەلبىمىزدە قالدۇرۇپ، تېخىمۇ خۇشال،تېخىمۇ ھاياتى كۈچكە تولغان ھاياتتا ياشاشقا چاقىرىدۇ.
خوگېن ناتورىنىڭ«پەرۋا قىلماسلىق مەشىقى»ناملىق كىتابى مۇنداق ئالتە بۆلەكتىن تەركىب تاپقان بولۇپ:
1.سەزگۈلىرىڭىزنى تېخىمۇ كۈچلەندۈرۈڭ
2.بۇ-سىزنىڭ كۆپ ئويلاپ كەتكىنىڭىزدىن
3.چۈشكۈنلىشىپ قالغىنىڭىزدا مۇنداق ئويلاڭ
4.سېلىشتۇرماڭ، ئەيىپلىمەڭ، كونا ئىشلارنى سۆرەپ چىقماڭ
5.ھازىرنىڭ ئۆزىدە ياشاش
6.ھاياتىڭىزنى ئاددىيلاشتۇرىدىغان ئۇسۇللار
تۆۋەندە ھەر بىر تېما ئۈستىدە كىتاب ئوقۇغاچ خاتىرىلەپ قويغان ئۈزۈندىلەرنى سۇنماقچىمەن.
Blue Skies-Daveed
سىز ئانچە ياقتۇرمايدىغان ئادەم بىلەن ئامال بار ئارىلىق ساقلاڭ
سىز شۇ ئادەمنىڭ ئۆزىنى ئەمەس، ئۇ ئادەمدە بار مەلۇم بىر ئالاھىدىلىكنى ياقتۇرمىدىڭىز. ئەمەلىيەتتە، بۇ دەل سىز ئۆزىڭىزدە ئەسلىدە بار بولغان. ئەمما، بېسىلىپ قالغان، سىز تېخى كۆرەلمىگەن مەلۇم تەرىپىڭىزنى قارشى تەرەپتە كۆرۈپ قىلىپ ئۇنىڭ بۇ تەرىپىگە بەكرەك سەزگۈرلۈك بىلەن مۇئامىلە قىلدىڭىز، خالاس.
مۇنداق ئەھۋالدا ئەڭ ياخشى ئۇسۇلدىن بىرى-ئۆزىڭىز ياقتۇرمايدىغان شۇ كىشىلەر بىلەن مەلۇم ئارىلىق قالدۇرۇش. شۇنىڭ بىلەن بىرگە، بۇ دەل ئۆزىڭىزنىڭ بېسىلىپ قالغان، تېخى كۆرۈپ باقمىغان، قوبۇل قىلالمىغان شۇ تەرىپىڭىزنى قوبۇل قىلىشنىڭ، تونۇشنىڭ ياخشى بىر پۇرسىتى.
ئاچچىقىڭىزنى كەلتۈرىدىغان توچكىلارنى بىلىۋىلىڭ
قانداق ئىشلار ئاچچىقىڭىزنى كەلتۈرىدۇ؟ ئاچچىقىڭىزنى كەلتۈرىدىغان ئىشلارنىڭ نېمىلىكىنى بىلىۋىلىشنىڭ ئۆزىمۇ قەلبىڭىزنى تىنچلاندۇرىدۇ. يەنى، ئاچچىقىڭىزنى كەلتۈرىدىغان توچكىلارنىڭ نېمىلىكىنى بىلىش بەكمۇ مۇھىم.
سىزنى غەزەپلەندۈرىدىغان ئىشلار ئەكسىچە ھېچنىمە ئەمەس دەپ ئويلايدىغان كىشىدىن نېمىشقا ئۇ ئىشلارغا ئاشۇنداق خاتىرجەم ئىنكاس قايتۇرالايدىغانلىقىنىڭ سەۋەبىنى سوراپ بىقىڭ. بەلكىم بۇ ئارقىلىق ئاچچىقلانماس بولۇشنى ئۆگىنەلىشىڭىز مۇمكىن. ناۋادا شۇنداق قىلالىسىڭىز سىزنى بىئارام قىلىدىغان ئىشتىن بىرى ئازايغان بولىدۇ.
سىزنىڭ ئەتراپىڭىزدىمۇ مۇنداق كىشىلەر بارمۇ؟
سىزنىڭ ئەتراپىڭىزدىمۇ «ھەممەيلەن مۇنداق دېگەنىدى، مۇنداق دېيىشكەنتۇق» دەپ تۇرۇپ ئۇچۇر يەتكۈزىدىغانلار بارمۇ؟ دېققەت قىلسىڭىز بۇ يەردىكى«ھەممەيلەن» بەك بولسا بىر-ئىككى، كۆپ بولغاندىمۇ ئۈچ! شۇڭا«ھەممەيلەن مۇنداق دېيىشكەن» دېگەندەك ئۇچۇرلارغا ئانچە ئىتىبار قىلمىسىڭىزمۇ بولىدۇ. دېققەت قىلىشقا تېگىشلىكى دەل شۇنى يەتكۈزگەن ئادەم. ئۇ ئۆزىنىڭمۇ شۇنداق قارايدىغانلىقىدەك مەسئۇلىيەتتىن ئۆزىنى قاچۇرۇپ، خەققە ئەگىشىدىغان ۋە ياكى كۆپنىڭ پىكىرى بىلەن ياشايدىغان مەۋقەسى يوق كىشى، خالاس.
سەزگۈلىرىڭىزنى تېخىمۇ كۈچلەندۈرۈڭ
*ياخشى-يامان ئادەم بولۇش دېگەندەك قىممەت قارىشىنى چۆرۈپ تاشلاپ، مۇھىمى قەلبنىڭ تىنچلىقىنى مەقسەت قىلغان تۇرمۇشتا ياشىغاندا، تېخىمۇ كۆپ ئىللىق باھاردەك قۇياش كۈنلەردە ياشىيالايسىز.
*بىراۋغا ياخشىلىق قىلىش، مىھرىلىك بولۇش دېگەن ئىنسانغا نىسبەتەن بەك قالتىس ئىش. ئاشۇنداق بىر ئېسىللىقنى تېخىمۇ چاقنىتىش ئۈچۈن، قىلغان ئىشنى ئۇنتۇپ كەتمەك لازىمدۇر.
*گۈلگە ئوخشاش گۈزەل قىياپەت ھەم قەلبتە بولايلى.گۈلگە قاراپ ئاچچىقلىنىدىغان ئادەم بولمىغىنىدەك باشقىلارغا ئىللىق مۇئامىلىدە بولايلى.
*جىددىيلىكنى پەسەيتىشنىڭ ئەڭ ياخشى ئۇسۇلى غۇۋا يورۇقلۇقتىكى ئۆيدە تىنچقىنە قىلىش.
بۇ-سىزنىڭ كۆپ ئويلاپ كەتكىنىڭىزدىن
*باشقىلارغا يول بېرىپ، قارشى تەرەپنىڭ ئارزۇسىنى ئەمەلگە ئاشۇرۇپ بەرسىڭىز، ئۆزىڭىزنى شۇنچىلىك راھەت ھېس قىلىسىز.«ئالدى بىلەن سىزدىن كەلسۇن»دەپ باشقىلارغا يول بېرىشلەر كۆپ بولسا، يول قويۇشمۇ كۆپىيىدۇ. ئالدى بىلەن ئۆزىڭىزدىن باشلاپ«سىزدىن كەلسۇن» دەپ سىناپ بېقىڭ.
*ھاياتنى ئوڭۇشلۇق قىلىدىغىنى تەقدىردىن بەكرەك تالانت، تالانتتىنمۇ مۇھىم بولغىنى مىجەز.
*كىشىلەر تەرىپىدىن ياخشى كۆرۈلۈشنىڭ ئەڭ يېقىن يولى-ئالدى بىلەن ئۆزى كۆپچىلىكنى ياخشى كۆرۈش.شۇنڭغا ئوخشاش، چۈشىنىلىشنىڭ ئەڭ ياخشى يولى-ئالدى بىلەن باشقىلارنى چۈشىنىش. مۇنداقچە ئېيتقاندا، كۆپلەپ رومان ئوقۇپ بېرىش😂
*ئەتراپىمىزدىكى كىشىلەرنىڭ كۆپىنچىسى قوللىغۇچىمىز ئەمەس، دۈشمىنىمىزمۇ ئەمەس.
روھى بىسىمىڭىز ئېشىپ كەتكەندە
ھەتتا ئانچە يېقىن بولمىغان ئادەملەرگىمۇ ئېيتالىغۇدەك دەرىجىدىكى مەنپىي ئويلىرىڭىز تاشلاپ قويسىڭىز بولغۇدەك يېنىك دەرىجىدىكى پاسسىپ خىياللار ھېسابلىنىدۇ.
يېقىنلىرىڭىزغا ئېيتالىسىڭىز ئوتتۇرا سەۋىيەدىكى پاسسىپ خىيال بولۇپ، ئاڭلاپ بەرگۈدەك بىرەرىگە سۆزلەپ بەرسىڭىزلا يېنىكلەپ قالىسىز.مەسىلە، باشقىلارغا ئېيتقىلى بولمايدىغان، ھېچكىمگە مەسلىھەتمۇ سالالمايدىغان ئېغىر روھى بىسىم.
ئەگەر بۇ خىل روھى ھالەت ئۈچ كۈنمۇ داۋاملاشسا ھەل قىلمىسىڭىز بولمايدۇ. يەنى ئۆزىڭىزدىن«مەن نېمىشقا مۇنداق پاسسىپ روھى ھالەتكە چۈشۈپ قالىمەن؟ مەن نېمىنى ياقتۇرمايمەن؟ مەن نېمىنى خالايمەن؟ مېنىڭ ئەھۋالىم قانداق؟ قارشى تەرەپ نېمە ئۈچۈن مۇنداق قىلىدۇ؟ دېگەنلەرنى ئويلىنىپ كۆرۈڭ.
قارشى تەرەپنىڭ ئەھۋالى ۋە پىكىر قىلىش ئۇسۇلىغا ئۆزىڭىزنى قويۇپ ئويلىنىپ كۆرگەندە«ئۇ ئادەمنىڭ بۇنداق قىلىشى تەبىئىي ئىشقۇ!» دەپ كۆڭلىڭىزگە ئېلىپ ئولتۇرمايسىز.
تاشلاشنىڭ ئۈچ مۇھىم نۇقتىسى:
- «بىر كۈنلەردە ئىشلىتىپ قالارمەن»دېگەن ئوينى چۆرۈپ تاشلاڭ.
- «لازىممۇ-لازىم ئەمەسمۇ؟» ئەمەس «ئىشلىتىلەمدۇ-يوق؟»دەپ ئايرىڭ.
- بىكاردىن كەپ قالغان نەرسىلەرنى تاشلىۋىتىڭ.
ئارتۇق نەرسىلەرنى تاشلاپ، رەتلەپ تۇرغاندا ئۆي راھەتلا بولۇپ قالماستىن، قەلبمۇ تازلىنىپ راھەتلىنىپ قالىدۇ.«تاشلىۋەتسە ئىسراپ بولىدۇ»دەپ ئويلاش ئالىيجانابلىق بولسىمۇ، قەلبنىڭ تازلىنىشى تېخىمۇ قىممەتلىك.
تەبىئەتكە يېقىن تۇرۇڭ
كىشىلىك مۇناسىۋەتتىن سەل ھارغىنلىق ھېس قىلىۋاتقان بولسىڭىز ، تەبىئەت ئىچىدە تۇيغۇلىرىڭىزنى تىڭشاپ بېقىڭ.
يۇلتۇزلۇق ئاسمان، ئېگىز چوققىدىن كۆتۈرۈلگەن قۇياش نۇرى، ئورماننىڭ جىمجىتلىقى، كەچكى شەپەقنىڭ گۈزەللىكى، قارلىق تاغنىڭ ھەيۋەتلىكىلىكى…
ئاددى ئىنساننىڭ ئەقلى يەتمىگۈدەك، ھەر بىر رەسسامنىڭ قەلىمى بىلەن خاتىرىلەپ قويغۇسى، ھەر قانداق بىر مۇزىكانتنىڭ سىمفونىيە قىلىپ چالغۇسى كەلگۈدەك ئەقلىنى لال قىلىدىغان گۈزەل كارتىنىلار تەبىئەت دۇنياسىدا نۇرغۇن. ئەقىل بىلەن چۈشىنىشكە ئاجىزلىق قىلىسىز.ئەقلى تەپەككۇر قىلىمەن دېسىڭىز قەلبىڭىز قۇرۇپ كېتىدۇ.پەقەت سەزگۈلىرىڭىز ئارقىلىقلا ھېس قىلىش قەلبىڭىزنى ئىللىتىدۇ.
لوگىكا دېگەنلەرنى چۆرۈپ تاشلاپ، قەلبىڭىزنىڭ نېمىلەرنى ھېس قىلىۋاتقانلىقىنى، تۇيغۇلىرىڭىزنى تىڭشىغۇدەك ۋاقىت چىقىرىڭ. تەبىئەت ئىچىدىكى تۇيغۇلىرىڭىزدىن ھۇزۇرلىنىڭ. تەبىئەت سەزگۈلىرىڭىزنى غىدىقلاپ ، سىزگە تېز ۋە ئاقىلانە جاۋابنى بېرىدۇ.
چۈشكۈنلىشىپ قالغىنىڭىزدا مۇنداق ئويلاڭ
*بىرەرسى كۆڭلىڭىزنى ئاغرىتقۇدەك گەپ قىلىپ ئارقىدىن«قايسى كۈنى قاملاشمىغان بىرگەپ قىپ قاپتىمەن، كەچۈرۈڭ ھە»دېسە، ھەقىقەتەن كۆڭلىڭىزگە ئېلىپ، شۇ كۈنى كېچە ئۇخلىيالمىغان سىز يەنە«ۋاي ياق، كۆڭلۈمگە ئالمىدىم» دەمسىز؟ مۇنداق ۋاقىتتا سەمىمىيلىك بىلەن«سىز مۇنداق دېگەندىن كېيىن يىنىكلەپ قالدىم» دېگىنىڭىز تۈزۈك.ئادەم پىشىپ-يېتىلگەنسىرى كۆڭلىدە يوق گەپنى قىلىپ ئولتۇرمايدىغان، بارغانسىرى سەمىمىيلىشىدىغان گەپكەن.
بۇ قۇرلارنى ياقتۇردۇم. يۇقارقىدەك ئەھۋالدا مەنمۇ كۆڭلۈمگە كەلگەنلىكىنى ئىتىراپ قىلىدىغان، يالغاندىن كۆڭلۈمگە ئالمىغاندەك قىياپەتكە كىرىۋالمايدىغان بولدۇم بۇرۇنقىدەك.
*سىز باشقىلارغا دەخلى-تەرۇز يەتكۈزدىڭىزمۇ-يوق بۇنى بېكىتىدىغىنى قارشى تەرەپ. كىشىلەر ئۆز-ئارا ئىلىش-بىرىش قىلىش، بىر-بىرىگە تايىنىش ۋە ئۆز-ئارا ياردەم بېرىش ئارقىلىق ياشايدۇ.بۇ دۇنيادا بىز بەزىدە باشقىلارغا ئاۋارىچىلىق ئەكىلىدىغان ، يەنە بەزىدە باشقىلار بىزنى ئاۋارە قىلىدىغان بىركىمنىڭ بىركىمدە قالمايدىغان دۇنيا.
*بۇ دۇنيادا سىزنىڭ ئەڭ ناچار تەرەپلىرىڭىزنى ئۆزىڭىزچىلىك بىلىدىغان ئادەمدىن يەنە بىرى يوق. سىزنى ئۆچ كۆرىدىغان بىرىنىڭ سىزنى ئۇنچلىك بىلىپ كېتىشى ناتايىن. شۇڭا، باشقىلارنىڭ سىزگە قانداق قارىشىدىنمۇ بەكرەك سىزنىڭ باشقىلارنى قانداق ئويلىشىڭىز مۇھىم.
ھاياتىڭىزنى ئاددىيلاشتۇرىدىغان ئۇسۇللار
*قارشى تەرەپكە يۈرىكىنى ئىچىپ تۇرۇپ سۆزلەش-سۆھبەتلىشىش بولىدۇ.سۆھبەتنىڭ ئاساسى سەمىمىيەت بولۇشى كېرەككى، مۇشۇلا بولسا، گەپكە بەك ئۇستا بولمىسىڭىزمۇ قارشى تەرەپكە يەنىلا دېمەكچى بولغانلىرىڭىزنى راھەت، چىرايلىق يەتكۈزەلەيسىز. ياخشى سۆزلىيەلمىسىڭىزمۇ، يۈرىكىڭىز ۋە سۆزلىرىڭىزدە سەمىمىيەت بولسلا كۇپايە.
*قەدىمدىن باشلاپ ، كېچىنى ئالۋاستىلار يەر يۈزىدە ئايلىنىپ يۈرىدىغان ۋاقىت دەپ قاراپ كەلگەن. «كېچىدە سىقىرتىشقا بولمايدۇ »دېيىشلەر سىقىرتقان ئاۋاز جىم ياتقان ئالۋاستىلارنى ئويغىتىۋىتىشىدىن ئەنسىرەش-قورقۇنچلىرى سەۋەبىدىن بولۇشى مۇمكىن. شۇڭا، ئۇ زامانلاردا ئادەملەر كېچىلىرى سىرتقا چىقمىغان.
*ئادەملەرنى خوشۇم بار-يوق دەپ ئايرىيدىغانلار يىمەكلىكنىمۇ ئاشۇنداق ئايرىيدۇ. يىمەكلىكنى ئايرىماي يىيىش بەدەننىڭ ئوزۇقلۇقنىڭ تەڭپۇڭ قوبۇل قىلىنىشغا يارىدىمى بولسا، كىشلەرنى بەك ئايرىماي ئارلىشش كىشىلىك مۇناسىۋەتنى تېخىمۇ ياخشىلايدۇ، ھايات تېخىمۇ رەڭدارلىشىدۇ.
*تاماقتىن بۇرۇن: ھەر بىر تال گۈرۈچ سانسىزلىغان ئادەملەرنىڭ ئەجرى بىلەن كەلگەن. ھەر بىر تامچە سۇ رەببىمنىڭ مەرھەمىتى بىلەن بېرىلگەن. مىننەتدارلىق بىلەن يەيمەن.
تاماقتىن كېيىن:رەببىمنىڭ مەرھەمىتى بىلەن ھوزۇرلىنىپ غىزالاندىم. بەدىنىمگە تەقۋا، روھىمغا ئوزۇق قىلىپ بەرگىن. قەلبىمنى توغۇرلاپ بەرگىن. بەرگەن رىزقىڭ ئۈچۈن چەكسىز ھەمدۇسانالار بولسۇن.
*ئەگەر ھاياتىڭىزنى چوڭقۇر مۇھەببەت ۋە تولىمۇ قەدىرلەپ كۆڭۈل قويۇپ ئۆتكۈزسىڭىز، غەم-ئەندىشىلىرىڭىز، تىت-تىت بولۇشلىرىڭىز قاچانلاردىدۇر يوقاپ كېتىدۇ.
ھاياتتىكى ئەڭ قالتىس مۇناسىۋەت-نىكاھتۇر
ئەر-خوتۇن ئەسلىدىلا يات ئادەملەر. ئۇلار ئوخشىمىغان جايلاردا تۇغۇلۇپ چوڭ بولغاچقا،بىللە ياشاش ئۈچۈن ھەمكارلىشىقا توغرا كېلىدۇ. ئۆلۈش ئالدىدا«سىز بىلەن توي قىلىپ توغرا قىپتىمەن» دېيەلەيدىغان نىكاھتا ياشاش ئۈچۈن مەسىللەرنى ئورتاق ھەل قىلىش ھەم ھەمكارلىشىپ ياشاشقا توغرا كېلىدۇ.
بىزنىڭ سېغىنىش ئىچىدە ئەسلەيدىغىنىمىز كۆپىنچە كىملەر بىلەن نېمىلەرنى بىللە قىلغان ۋاقىتلىرىمىزدۇر. ئاتا-ئانىمىز، قېرىنداشلىرىمىز بىلەن بولغان ئەسلىملەر، دوستلىرىمىز، سۆيگەن ئادىمىمىز بىلەن بولغان ئەسلىمىلەر …
ئوخشاش ۋاقىت، ئوخشاش جايدا ئورتاق باشتىن كەچۈرگەنلىرىمىز رىشتىمىزنى تېخىمۇ كۈچەيتىدۇ.شۇڭا، ئەر-ئايال ئوتتۇرىسىدىكى ياخشى نىكاھ مۇناسىۋىتىنى ساقلاپ قىلىش ئۈچۈن ئورتاق كەچمىش ئىنتايىن مۇھىم. «ئىككىمىز بىرلىكتە..» مانا بۇ ياخشى بىر نىكاھتىكى ئاچقۇچلۇق سۆز.
ئوخشاش جايلارغا بېرىڭ، ئوخشاش نەرسىلەرنى كۆرۈڭ، ئوخشاش نەرسىلەرنى ئاڭلاڭ ، ئوخشاش نەرسىلەرنى يەڭ. مانا مۇشۇنداق ئوخشاش كەچمىشلىرىڭىز ئۇلغىيىپ ماڭسۇن. بىر كۈنلەرگە بارغاندا «ھېلىقى چاغدا مۇنداق بولغانىدى..» دېگەندەك ئورتاق ئەسلىمىلىرىڭىز كۆپ بولىدۇ.
كىشىلەر ئوتتۇرىسىدىكى بارچە مۇناسىۋەتلەر ئىچىدە ، نىكاھ دەل ئاشۇنداق ئورتاق كەچمىشلەر ئەڭ كۆپ ئەڭ قالتىس مۇناسىۋەت.
ھەر بىر شەيئى-بىر ئەسەر
ياش چوڭايغانسىرى ياشلىقتا بايقىمىغان ھاياتنىڭ چۇڭقۇر تەرەپلىرىنى تىتىيالايدىغان بولىدۇ.
كائىناتتىكى ھەر بىر شەيئى بىر ئەسەر. تېلىفۇن، كىتاب، رەسىم، ئۆي، يەرشارى..ھەتتا، سىزنىڭ ھاياتىڭىزمۇ.پەقەت ھازىرنىلا كۆرسىڭىز سىزنى ھالا بۈگۈنگە ئەكەلگەن، سىزنى قوغداپ كەلگەنلەرنى بىلەلمەيسىز.
بۈگۈنگە قەدەركى كەچمىشلىرىڭىزنى يېزىپ بېقىڭ. ھاياتىڭىزنىڭ مۇھىم قىسىملىرىنى، ھەتتا تاكى ھازىرغىچە بايقاپ بولالمىغان مۇھىم قىسملىرىنى بايقاپ قالىسىز.
ئادەم ھەردائىم دېگەنلىرى، يازغانلىرى ئۈستىدە ئىمتىھان بېرىپ، سېنىلىپ تۇرىدىكەن. شۇنچە گۈزەل، مەپتۇنكار مەنزىرە ئىچىدىن بىرەر ئەخلەتنى تېپىۋىلىپ، شۇنى سۈرەتكە تارتىۋىلىپ، ئەخلەت ئۈستىدىن شىكايەت قىلىپ قالىدىكەن..
ئەلۋەتتە، بىر كىتاب بىلەن، بىر جۈملە سۆز بىلەن ھايات ئۆزگىرىپ كېىتىدىغان، باشقىچە ئادەم بولۇپ كېتىدىغان ئىش يوق. ئەڭ مۇھىمى ھەر كۈنلۈك ئادىتىمىزنى، ئىزچىللىقىمىزنى داۋاملاشتۇرالىساق، كۈنىدە 20مىنۇت بولسىمۇ كىتاب ئوقۇيالىساق..بۇ ئوقۇغانلىرىمىز، ئىزچىللىقلىرىمىز ئاز-ئازدىن توپلىنىپ بىر كۈنلەرگە بارغاندا گۆھەر بولۇپ چاقنايدۇ.
كىتاب توغۇرلۇق ئېيتىدىغانلىرىم بىرەر قۇر تۈگىدى. ئەمدى ئۆزۈم توغۇرلۇق ئازراق توختىلاي. يېقىندىن بۇيانقى ھالىتىم پەقەت ئىزچىل «جىمجىت قوبۇل قىلىش» ھالىتىدە. مۇنداقچە قىلىپ ئېيتقاندا، كىتابلارنى ئوقۇۋاتىمەن، قوبۇل قىلىشقا تېگىشلىكلىرىنى قوبۇل قىلىۋاتىمەن، تەھلىل قىلىۋاتىمەن. ئەمما، چىقىرىشقا، يېڭى بىر كۆز قاراش، يېڭىچە بىر ئەسەرنى چىقىرىشقا ئالدىراپ كەتمىدىم. بىر كۈنلەر كەلگەندە بەلكىم، ھەممىسى يېغىلىپ يېڭىچە بىر شەكلىدە ئوتتۇرىغا چىقىدۇ، مەنمۇ شۇنداق بولۇشىنى ئۈمىد قىلىمەن.
ئامان بولۇڭلار، ھەممىمىزگە ياخشىلىقلار، گۈزەل كۈنلەر يار بولسۇن!
*************************
رەيھان ئابلەت
2025.08.10(يەكشەنبە)
ئىنكاس يازىمەن