2023.12.01
ئەڭ ياخشى كۆرىدىغان تەرەپلىرىم
ئۆزىڭىزنىڭ ناچار تەرەپلىرىنى تەنقىدلەۋەرمەستىن، ئارتۇقچىلىقلىرىڭىزغىمۇ دىققىتىڭىزنى بېرىڭ.
تاشقى قىياپىتىڭىزنىمۇ ئۆز ئىچىگە ئالغان ئۆزىڭىز ياقتۇرىدىغان 25 خىل يارقىن نوقتىڭىزنىڭ تىزىملىكىنى يېزىپ چىقىڭ. يېزىشنىڭ ۋاقىت چەكلىمىسى يوق. «ئۆزىنىڭ ياخشى تەرەپلىرىنى يېزىپ ئولتۇرۇش بىر خىل ئەخمىقانىلىق ئەمەسمۇ؟!» دەپ ئويلىشىڭىز ھاجەتسىز، ئۆزىڭىزگە ھۆكۈم پىچىشقا تېخىمۇ بولمايدۇ. يېزىپ بولغاندىن كېيىن، قايتا بىر كۆز يۈگۈرتۋەتكەندىن كېيىن موھىم يەردە ساقلاپ قويۇڭ ھەمدە ئەسكەرتىش سىستىمىسىنى ئالتە ئايغا تەڭشەپ قويۇپ، ۋاقىت توشقاندا ئۇنى چىقىرىپ قايتا ئوقۇپ بېقىڭ. بۇ خىل مەشىقنى يىلدا بىر قېتىم تۇغۇلغان كۈنىڭىزدە ئىشلەپ باقسىڭىزمۇ ۋە ياكى تەكرار سىناپ باقسىڭىزمۇ بولىدۇ.
ئۆزىڭىزگە قانچىلىك مۇھەببەت بەرسىڭىزمۇ، ھەرگىزمۇ ئاشۇرىۋەتكەن بولمايسىز.
G Minor Bach __ Jacob’s Piano
2023.12.02
رەت قىلىش ئەپسانىسى
بىرەرسى سىزنى رەت قىلغان تەقدىردىمۇ، ئۇ پەقەت شۇ كىشىنىڭلا كۆز–قارىشى، خالاس. ئۇنىڭغا ئۇنىڭدىن ئارتۇق تەبىر بېرىشنىڭ زۆرۈرىيتى يوق.
2023.12.03
مەڭگۈلۈك ئەمەس
يۈز بېرىۋاتقان ئىشلارنىڭ ھەممىسى ۋاقىتلىق. بۇ دۇنيادا ھېچقانداق نەرسە مەڭگۈلۈك بولغان ئەمەس. بىز دۇچ كەلگەن قىيىنچىلقمۇ ھەم.
2023.12.04
قەلبىڭىزگە سۆزلىگۈدەك بوشلۇق بېرىڭ
قەلبىڭىزدىكى سۇئاللارغا جاۋاب ئىزدىگەندە، باشقىلاردىن سوراش ۋە ياكى سائەتلەپ ۋاقىت سەرپ قىلىپ باشقا جايلاردىن جاۋاب ئىزدىگەندىن كۆرە، ئۆزىڭىز بىلەن تىنچقىنە قالسىڭىز ئىزدىگەن جاۋابىڭىزغا تېزراق ئېرىشەلىشىڭىز مۇمكىن.
ۋاڭ–چۇڭغا تولغان قايناق كوچىلاردىن بىر پەس ۋاز كېچىڭ. يالغۇز ئايلىنىشقا چىقىپ، يۈزىڭىزگە ئۇرۇلغان مەيىن شامالنى ھېس قىلىڭ.
قولىڭىزغا بىر ئىستاكان قىززىق ئامراق ئىچىملىكىڭىزنى ئېلىپ، تىنىچ ئولتۇرۇپ، كاللىڭىزدىكى چۇۋۇلۇپ كەتكەن ئوي–پىكىرلەرنىڭ رەتلىنىشى ئۈچۈن ۋاقىت بېرىڭ.
سۈكۈتتە ھامان بوشلۇق بولىدۇ. قەلبىڭىزگە سۆزلىگۈدەك بوشلۇق بەرسىڭىز، ئۇ سىزگە توغرا جاۋابنى ئېيتىپ بېرىدۇ.
2023.12.05
كۆڭۈل بۆلۈش ۋە ئۆزىگە كۆڭۈل بۆلۈش
ئۆزىنى ئەيىپلەپلا يۈرىدىغان كىشىلەر ئاڭسىز ھالدا ئۆزى بىلەن باشقىلار ئوتتۇرىسىدا ئارىلىق شەكىللەندۈرىۋىلىپ، چەك–چېگرا ئايرىۋالىدۇ. شۇڭا كىشىلەرگە ھەرقانچە ياخشى مۇئامىلە قىلىشقا ئۇرۇنسىمۇ، يەنىلا ئۆزىنى باشقىلاردىن ئايرىلىپ تەنھا قالغاندەك ھېس قىلىشىدۇ.
ئۆزىڭىزگە ياخشى مۇئامىلە قىلىشقا باشلىغاندا، تەبىئى ھالدا باشقىلارغىمۇ ياخشى مۇئامىلە قىلالايدىغان بولىسىز. ئۇنداقتا، ئۆزىڭىزگە قانداق ئۇسۇلدا كۆڭۈل بۆلمەكچى سىز ؟
ئامېرىكىلىق پىسخولوگ كىرىستىن نېف
2023.12.06
نۇمۇس قىلىشنى چۆرىۋىتىڭ
سىز ئادەم. بۇ يەردە ياشاشقا ھەقلىقسىز. بۇ دۇنيادا سىزگە مۇھتاج، سىزنى سۆيىدىغانلار بار! سىز تەڭرىنىڭ نۇقسانىسىز، مۇكەممەل ئەسىرى!
ئۆزىڭىزنىڭ مەلۇم تەرىپىدىن نۇمۇس قىلغىنىڭىز-دەل بۇ خىل كەمسىنىشكە كۈچ بەرگەنلىكىڭىزدىندۇر. يەنى، بۇ خىل كەمسىنىش ھوقۇقنى بېرەلەيدىغان بىردىنبىر ئادەم دەل ئۆزىڭىز.
كەمسېنىش تۇيغۇسىنى قەيسەرلىك، چىدامچانلىق ۋە ھېسداشلىق تۇيغۇسىغا ئايلاندۇرغىلى بولىدۇ. ھاياتىڭىزدىكى ياخشى–يامان بارلىق كەچۈرمىشلەر سىزنى بۈگۈنكى سىز قىلغان.
ئادەم ئۆزى ئەڭ نۇمۇس قىلىدىغان ئىشىنى ئىشەنچىلىك بىرەرسىگە سۆزلەپ بېرىش ئارقىلىق نورمال ھالىتىگە قايتقىلى ھەم قەلبىنى چۇلغىۋالغان ئوڭايسىزلىقنىڭ تەسىرىنى يوقىتالايدۇ. چۈنكى، ھەر قانداق ئادەمدە مەلۇم نۇمۇس قىلىدىغان تۇيغۇ بولۇشى نورماللىق.
ئۆزىڭىز نومۇس ھېس قىلىدىغان ئىشنى ئىشەنچلىك ئادەمگە ئېيتىپ بېرىڭ. شۇنداق قىلىش ئارقىلىق بۇ خىل كەمسىنىشنى چۈشىنىش، ئۈمىد، ھېسداشلىققا ئايلاندۇرالايسىز، شۇنداق قىلالامسىز؟
2023.12.07
خاتالىق ئۆتكۈزۈپ تۇرايلى
قانچىلىغان قېتىم خاتالىق ئۆتكۈزۈپ باقسىمۇ بولىۋىرىدۇ. ئادەم دېگەن خاتالىق ئارقىلىق ئۆزىنى تونۇيدۇ. قانچە خاتالاشقانسىرى، شۇنچە ئىشنىڭ يولىنى بىلىدىغان بولىدۇ.خاتالىقلىرىڭىز سىزنى ئۆسۈپ–يېتىلدۈرىدۇ، قىيىنچىلىقلارغا تاقابىل تۇرۇش كۈچىڭىزنى ئاشۇرىدۇ. تېخىمۇ ياخشى، تېخىمۇ كۈچلۈك،تېخىمۇ ئەقىللىق قىلىدۇ.
ئويلاپ بېقىڭ: مەغلۇپ بولسىڭىز، مەغلۇبىيىتىڭىز سەۋەبلىك بىرەرى ئاۋارىچىلىققا ئۇچىرامدۇ؟ ئەگەر جاۋابىڭىز «ياق»بولسا، ئۆزىڭىز خالىغان ئىشنى قىلىڭ، خاتالىشىپ بېقىڭ.
خاتالىشىشتىن قورقمايدىغانلار تەۋەككۈلچىلىككە تولغان ھاياتتا ياشىيالايدۇ، ھاياتنىڭ قىممەتلىك دەرسلىرىگە نائىل بولالايدۇ.
مەغلۇپ بولساق، قايتا–قايتا سىناپ باقساق بولىدۇ. تەكرار سىناش ئارقىلىق ئۆسۈپ–يېتىلىمىز.
2023.12.08
ئۆزىڭىزگە ئىشىنىڭ
باشقىلارنىڭ مەسلىھەتىگە قۇلاق سېلىش موھىم بولسىمۇ، ئۆزىگە ئىشىنىشمۇ ناھايىتى مۇھىم.
بىۋاستە سىزىم بەدىنىمىزگە ئورۇنلاشتۇرۇلغان كومپاس بولۇپ، ئۇ ھەمىشە توغرا يۆنىلىشنى كۆرسىتىپ بېرىدۇ.
مېڭە قارشى تۇرغان تەقدىردىمۇ، بىۋاستە سىزىم «ماقۇل» دېگەن بولسا، يەنىلا بىۋاستە سىزىمىمىڭىزغا ئەگىشىڭ. ئۆتكۈر بىۋاستە سىزىم ئاساسەن توغرا چىقىدۇ.
2023.120.9
ھەممىنى مەدىھلەش
ھايات تولىمۇ قىسقا. كىچىك ئىشلاردىن چوڭ– ئىشلارغىچە دۇنيادىكى ماختاشقا تېگىشلىك بارچنى ماختاپ بېرەيلى.
2023.12.10
مۇكەممەلسىزلىكنىڭ ئۆزى مۇكەممەللىك
ئۆزىڭىزنىڭ يورۇق تەرىپىنىلا ئەمەس، قاراڭغۇ تەرىپىنىمۇ قوبۇل قىلىڭ، مانا بۇ سىز!
ئاچچىقلىغان، خۇشال بولغان، ئازابلانغان، ئارتۇقچىلىقلىرى بولغىنىدەك ناچار تەرەپلىرىمۇ بار بولغان ئادەم دەل سىز!
ئەسلى ئۆزىڭىزنى شەرتسىز قوبۇل قىلىش–دەل مۇھەببەتنىڭ ھەقىقىي شەكلى بولۇشى مۇمكىن.
ئەينەكتىكى ئۆزىڭىزگە قاراپ ئاھ ئۇرۇپ قالامسىز؟«بۇ يېرىم بولمايدۇ، ئۇ يېرىم بولمايدۇ»دەپ ئۆزىڭىزدىن نۇقسان تېپىپ يۈرەمسىز ياكى نۇقسانلىرىڭىزنىمۇ قوشۇپ بارىڭىزنى قوبۇل قىلالامسىز؟ ياكى بولمىسا «ئورۇقلىيالىغان بولسام…»، «مۇشۇ يېرىم ئازراق مۇنداق بوپكەتكەن بولسا…» دېگەندەك شەرتلەرنى ئۆزىڭىزگە قويىۋاتامسىز؟
ئۆز–ئۆزىنى شەرتلىك سۆيۈشنىڭ قانداق مەنا بېرىدىغانلىقى ھەققىدە ئويلىنىپ كۆرۈڭ.
يەنە بىر ئوماق كارتۇن2023
2023.12.11
بەخىتلىك بولۇشنى قارار قىلغانلىقتىن
بەخىت–ئۆزىڭىز تاللايدىغان نەرسە. كىشىلەر كۆپىنچە ھاللاردا تۇرمۇش ئوڭۇشسىزلىققا ئۇچىرىغان چاغلاردا، بۇ نوقتىنى ئاسانلا ئۇنتۇپ قالىدۇ.
تۆۋەندىكى سۆزلەرنى لازىم بولغاندا تەكرارلاپ بېرىڭ.
«ھاياتىم قالايمىقانچىلىق ئىچىگە پېتىپ قالغىنىدىمۇ، مەن يەنىلا بەخىتلىك. چۈنكى، مەن ئاللىقاچان بەخىتلىك بولۇشنى قارار قىلغان».
2023.12.12
سېھىرلىنىپ بېقىڭ
قۇشلارنىڭ سايراشلىرىغا قۇلاق سېلىڭ.
يامغۇردىن كېيىنكى ھەسەن-ھۈسەنلىك ئاسماندىن ھوزۇرلىنىڭ.
كېيىنكىلەر ئۈچۈن رەسىملىك ئەسلىمە قالدۇرۇپ قويۇڭ.
يازنىڭ تىنجىق كۈنلىرىدىكى سالقىن شامالغا «رەھمەت» ئېيتىڭ.
چۈشتىن كېيىن بىر ئىستاكان قېزىل ئۈزۈم ھارىقىدىن ھوزۇرلىنىپ بېقىڭ.
ئۆزىڭىز بىلەن قالغان يالغۇز ۋاقتنى قەدىرلەڭ.
مانا بۇلار سىزنىڭ بارلىقىڭىز.
ۋەلسىپىتلىك مەھەللە ئايلانغان، قۇشلارنىڭ سايراشلىرى، ئاخىرىقى كۈز يوپۇرماقلىرىدىن ھوزرۇلغان سەھەر.. كۆپىنچە ھاللاردا شۇ بەتلىك مەزمۇنغا شۇ كۈندىكى ئىشلار، ئويلىرىم ماس كەپقالىدۇ دېسە.
2023.12.13
ئۆزىڭىزنى كەچۈرىۋىتىڭ
سىز ئادەم.
ئۆزىڭىزگە ياخشى مۇئامىلە قىلىڭ.
ھېلىمۇ پۈتۈن كۈچىڭىز بىلەن تىرىشىۋاتىسىز.
ئازراق ئارام ئالغانلىقىڭىز ئۈچۈن ئۆزىڭىزنى جازالىماڭ.
چوڭقۇر نەپەس ئېلىپ، ئۆزىڭىزنىڭ بارچە خاتالىقىنى كەچۈرىۋىتىڭ.
باغچامدىكى بۇ يىللىق ئاخىرىقى گۈلۈم
2023.12.14
ھاياتنى چۈشىنىش
نېمە ئىشلارنىڭ يۈز بېرىدىغانلىقىنى بىلمەسلىكنىڭ ئۆزى–ھايات.
ھاياتنىڭ كىشىنى گاڭگىرىتىپ قويىدىغانلىقىمۇ، يەنە تەڭداشسىز گۈزەللىك ۋە مۆجىزىلەرگە تولغانلىقىمۇ دەرھەقىقەت.
مانا مۇشۇنداق زىددىيەتكە تولغان ھاياتقا قارشى ياشامسىز ۋە ياكى ئۇنى قوبۇل قىلامسىز ئۆزىڭىزگە باغلىق.
ھاياتقا قارشى چىقمىسىڭىز، قانداق ئىش يۈز بېرىشىدىن قەتئىينەزەر قەددىڭىزنى پۈكمەستىن ياشىيالايسىز.
2023.12.15
شۇ يەردە بولسىڭىزلا بولسىڭىزلا كۇپايە
ھېچ ئىش خۇشياقمايدىغان كۈنلىرىڭىزمۇ بوپقالىدۇ، شۇنداققۇ؟
مۇنداق چاغلاردا ھېچ ئىش قىلمىسىڭىزمۇ بولىۋىرىدۇ. پەقەت شۇ يەردە بولسىڭىزلا كۇپايە.
2023.12.16
ئۆزىڭىز ئەڭ ياخشى دەپ قارىغان ھاياتنى قوغلىشىڭ
باشقىلارنىڭ نېمە دېيىشىدىن قەتئىينەزەر، ئۆزىڭىز ياقتۇرىدىغان ئىشلارنى قىلىڭ ھەم ئۆزىڭىز پەخىرلەنگۈدەك ھاياتتا ياشاڭ.
ياخشى ھەمراھراھلىرىڭىز بولسۇن. ئىجادىي ئىشلار ئۈچۈن ۋاقىت ئاجىرىتىڭ. خۇشپۇراق چاي–قەھۋەلەردىن ھوزۇرلىنىڭ.
يۈرىكىڭىزدىن كۈلۈمسىرەڭ، باشقىلاردىن ئۆگىنىڭ ھەم قەدىرلەڭ، ئارزۇيىڭىز بولسۇن، ھاياتىڭىز مانا مۇشۇنداق گۈزەل تەكرارلارغا تولسۇن.
2023.12.17
مەن قىلالايمەنمۇ؟
جاۋابى شۇكى، شۇنداق، سەن قىلالايسەن، قىلالمىغۇدەك سەۋەبىڭ يوق. سەن چوقۇم قىلالايسەن، قىلالماسلىقىڭ مۇمكىن ئەمەس. چوقۇم قول سېلىپ قىپ باققىن.
قابىلىيىتىڭدىن گۇمانلىنىپ قالغىنىڭدا شۇنى ئەسكە ئالغىنكى، «شۇنداق، سەن قىلالايسەن.»
بۇ كۈنىنىڭ يارقىن نوقتىسى- پىئانو ماھارىتىنى كۆرسىتىش سەھنىسىدە پىئانو چالغىنىدىن ھوزۇرلىنىش بولدى..
2023.12.18 (sun)
ئىچكى تەنقىدچى
ھەر قېتىم بىرەر ئىشقا قارار بېرىدىغان ۋاقتىمىزدا«مۇشۇنداق قىلغىنىڭ توغرىمۇ؟» دەپ قوشۇق سالىدىغان ئىچىمىزدىن كېلىدىغان شۇ سادا دەل ئىچكى تەنقىدچىمىزدۇر. بۇ خىل ئىچكى تەنقىدچى تۇغما بولۇپ، ئۇنى ئۈزۈل-كېسىل يوقىتالمايمىز. بىراق، ئۇنىڭغا تۇتقان پوزىتسىيەرىمىزنى ئۆزگەرتەلەيمىز.
بېرىنجى قەدەمدە، ئىچكى تەنقىدنىڭ تەپەككۇرىڭىزنى توسۇپ قويۇۋاتقانلىقىنى بايقاڭ. ئۇ نېمە دەۋاتىدۇ؟ قاتتىق سۆزلەرگە ئۇچىرىغاندا، بەدىنىڭىزدە قانداق ئالامەتلەر پەيدا بولدى؟
كېيىكى باسقۇچتا، ئۆزىڭىزمۇ تېخى ئىشىنەلمىگەن تەقدىردىمۇ، ئىچكى تەنقىدنىڭ پۈتۈنلەي ئەكسىچە بولغان سۆزلەرنى ئۆزىڭىزگە ئېيتىڭ. مەسلەن: ئىچكى تەنقىدچىڭىز«تەجىرىبىلىرىڭ يىتەرلىك ئەمەس، بۇ ئىشنى باشلىشىڭغا تېخى بالدۇر.» دېگەن بولسا، سىز«مەندە قاچان باشلايمەن دېسەم باشلىيالىغۇدەك تەجىرىبىلەر بار.» دېيىشىڭىز كېرەك. مۇشۇنداق دەۋاتقىنىڭىزدا تەبىئي ھالدا ئۆزىڭىزنىڭ ئېيتۋاتقانلىرىڭىزغا ئىشىنىدىغان بولىسىز. ئىچكى تەنقىدچىنىڭ پاسسىپ سۆزلىرىگە تاقابىل تۇرغۇدەك بولغۇچە، ۋاقىت سەرىپ قىلىپ، چىداپ مەشىق قىلىشقا توغرا كېلىدۇ. ئۇندىن باشقا، ئىچكى تەنقىدلىرىڭىزنىڭ سىزنى ئىشەندۈرمەكچى بولغان سەلبى سۆزلىرىنى خاتىرىلەپ يېزىپ قويسىڭىزمۇ بولىدۇ. يېقىن ئادىمىڭىزئۆزىنى چۈشۈرىدىغان سەلبى گەپلەرنى قىلغاندا، ئۇنىڭغا قانداق تەسەللى بېرىدىغانلىقىڭىزنىمۇ يېزىپ قويۇپ، ۋاقىتى كەلگەندە، ئۇ سۆزلەرنى ئۆزىڭىزگە ئىشلەتسىڭىز بولىدۇ.
بەك قالتىس ئىشلىنىپتۇ. كىنونى كىنوخانىدا 3Dسىنى كۆرۈپ بېقىشقا ئەرزىيدۇ.2022
2023.12.19
قانداق ئويلىسىڭىز، كۆرىدىغىنىڭىزمۇ شۇنداق بولىدۇ
باشقىلاردىن كۆرىدىغىنىڭىز دەل ئۆزىڭىز. ئەسلى قىياپىتىڭىز ئاشكارلىنىپ قالغىنىدا، باشقىلاردىن كۆرىدىغىنىڭىزمۇ ئۇلارنىڭ ئەسلى قىياپىتى بولىدۇ.
سىزنى چۇلغىۋالغىنى زېرىكىش ھەم باشقىلارنى مەسخىرە قىلىش بولسا، باشقىلاردىن كۆرىدىغىنىڭىزمۇ ئوخشاش بولۇپ چىقىدۇ–دە، بۇدۇنيا ئىشەنچسىزلىككە تولغان نەرسىگە ئايلىنىپ قالىدۇ. ھەر كۈندىكى تاللاشلىرىڭىز كىملىكىڭىزنى بەلگىلەيدۇ ھەمدە ئارلىشىۋاتقان دوستلىرىڭىز، ھاياتىڭىزدا نېمىلەرنى قىلىۋاتقىنىڭىزدائىپادىلىنىدۇ.
مۇھەببەتكە مۇھەببەت بىلەن جاۋاب قايتۇرامسىز ۋە ياكى مەسخىرىلەرگە مەسخىرە قىلىش بىلەنمۇ؟ سىز زادى قانداق ئادەم بولۇشنى خالايسىز؟
2023.12.20
مۇكەممەلسىزلىكدە گۈزەللىك بولىدۇ
مۇكەممەل بولمىغانلىقى ئۈچۈنلا گۈزەل.
ئەسلى ئۆزىڭىزنى سۆيۈڭ ھەم كىشىلەرنىڭمۇ ئەسلى ھالىتىنى سۆيۈڭ.
2023.12.21
قارمۇ–قارشىلىقنىڭ قىممىتى
يورۇقلۇقنىڭ قارشىدا قاراڭغۇلۇقنىڭ بولغىنىدەك، ھاياتنىڭمۇ ياخشى–يامان چاغلىرى بولىدۇ. گاھلاردا بەختسىزلىكنىڭ چۇڭقۇرھاڭلىرىغا چۈشۈپ كەتكىنىمىزدەك، بەزىدە بەخىتتىن بەئەينى بېشىمىز كۆككە تاقاشقۇدەك خۇشاللىقلارغىمۇ چۆمىمىز.
قىيىن كۈنلەردىن ھالقىشنىڭ بىردىنبىر يولى، بۇ قىيىن كۈنلەر ئۆتۈپ كەتكۈچە بەرداشلىق بېرىش! بەخىتنى ھېس قىلىشنىڭ بىردىنبىر يولى بولسا، بەخىت بىلەن بىرلىكتە دەس تۇرۇشتۇر. مانا بۇ ھايات! يەنى،ئازابلانغاندا بەرداشلىق بېرىش، خۇشال بولغاندا ئورنىدىن دەس تۇرۇش كېرەك.
بەرداشلىق بېرىش ئارقىلىق قىيىنچىلىقلارغا يۈزلىنەلىگۈدەك كۈچنى يېتىلدۈرەلەيمىز. ئورنىدىن دەس تۇرۇش ئارقىلىق قانات قىقىپ پەرۋازقىلىشنى ئۆگىنىمىز.
2023.12.22
باشقىلارنى چاقناتقۇزۇش
باشقىلارنىڭ تېخىمۇ چاقنىشى ئۈچۈن كۈچ بېرىڭ. مۇنداق قىلىش تەس بولغان تەقدىردىمۇ، ئۇلارغا ياخشى مۇئامىلىدە بولۇڭ. ئىنسانى مىھر–مۇھەببەتكە ئىشىنىڭ. كۆڭۈل بۆلىدىغانلىقىڭىزنى ئىپادىلەڭ. ھېسداشلىق قىلىڭ. ئەپۇ قىلىڭ.
ئەلۋەتتە، مۇنداق قىلىش ئاسان بولمىسىمۇ، بۇنى ئادەتكە ئايلاندۇرۇڭ. شۇنداق قىلالىسىڭىز، باشقىلاردىكى يوشۇرۇن كۈچنى ئېچىپ، چوڭ ئۆزگىرىشلەر ئۈچۈن ۋەسلە بولالايسىز.
2023.12.23
قانداق ئادەم ئىدىڭىز؟
باشقىلارنىڭ نەزىرىدىكى سىز بولۇشتىن ئىلگىرىكى سىز زادى كىم ئىدىڭىز؟ ئۇ ئادەم زادى قەيەرگە كەتتى؟ قايسى ئىشنى قىلغىنىدا كۆڭۈللۈك ھېس قىلاتتى؟
ئىچىڭىزدىن كېلىۋاتقان ساداغا ئىشەنگەن، قۇلاق سېلىۋاتقان ۋاقتىڭىز دەل ئۆزىڭىز بولغان ۋاقتىڭىز.
2023.12.24
سىزگە يۈكلەنگەن ۋەزىپە
ئۆزىڭىزگە خاس ئىددىيىڭىز بولسۇنكى، باشقىلارنىڭ ئىددىيەسىگە ئەگىشىپ كەتمەڭ.ئۆزىڭىزنىڭ ياخشى-يامان تەرەپلىرىنى قوبۇل قىلىڭ. باشقىلارغا قىلغان ياخشى مۇئامىلىڭىزنى ئۆزىڭىزگىمۇقىلىڭ.
باشقىلارغا تايانماستىن ئۆزىڭىزنىڭ ھاياتىڭىزدىن ئۆزىڭىز يول ئېچىڭ. بىلمەسلىكتىن قورقماڭ. باشقىلار ئۈچۈنمۇ ئورنىڭىزدىن دەس تۇرۇپ، ئۇلارغا كۈچ بولۇڭ. ئۆزىڭىزگە ئىشىنىڭ ھەمدە ھەر قانداق ئەھۋالدىمۇ ئۆزىڭىز بولۇپ ياشاۋاتقانلىڭىزغا ئىشىنىڭ. مەغلۇبىيەتتىن قورقماڭ، باشقىلارنىڭ پىكىرىگىمۇ قۇلاق سىلىڭ. شۇنداقلا، ئاخىرىقى ھېسابتا بارچە ئوڭۇشسىزلىقنىڭ غەلبىگە تۇتىشىدىغانلىقىغا ئىشىنىڭ. ئۇنداقتا، شۇ مىنۇتنىڭ ئۆزىدىكى كۆز ئالدىڭىزدىكى گۈزەللىكتىن ھوزۇرلىنىڭ.
سىز بىرمۆجىزە. بۇنى بىلىشنىڭ ئۆزى-ھاياتلىقتىكى ۋەزىپىڭىز.
2023.12.26
دوستلۇق نۇرى
دوستىڭىزنى قەدىرلەڭ. دوست ھاياتلىقىڭىزنىڭ ھەمراھى، ھايات نۇرىڭىز، خۇشاللىقىڭىزدۇر. جاھان قاراڭغۇلۇققا پاتقاندا، زىيادە يورۇقلۇق كۆزىڭىزنى چاققاندا، ئۇ كۆزىڭىزگە ئايلىنىدۇ. يېقىلغىنىڭىزدا يۆلەيدۇ. ھاياتنىڭ جىددى قەدەملىرىدە كېتىۋاتقىنىڭىزدا، يېنىڭىزدا سىز بىلەن بىللە بولىدۇ. مېڭىشقا تېگىشلىك يولىڭىزنى كۆرسىتىپ، سىزگە ھەقىقەتنىڭ نېمىلكىنى ئۆگىتىدۇ.
ئادەم ئۆزىنىمۇ ئاسانلا يوقىتىپ قويىدىغان ئۇشبۇ ئالەمدە دوستىڭىز سىزگە يول كۆرسىتىدىغان كومپاس ۋە مۇھەببەت چىرىغىڭىز بولالايدۇ.
مەندىن: نېمىدىگەن گۈزەل ئىپادىلەش! يېنىدا مۇشۇنداق دوستى بارلار ئۆزىنى ئەڭ گۈزەل رىزىقتىن بىرىگە ئېرىشتىم دەپ بىلسە بولىدۇ.
بۇ كۈنى سەھەردىكى كۆڭۈلداشلىق
2023.12.27
ئاق كۆڭۈل بولايلى
دۇنيا رەھىمىسز. بىز كۆرۈنگىنىمىزدىنمۇ ئارتۇق نازۇك، ئاسانلا يارىلانغۇچىلاردىن بىز.
كىشىلەرگە يېتىپ-ئاشقۇدەك ياخشى مۇئامىلىدە بولايلى.
مەندىن: دۇنيا رەھىمسىز ئەمەس، ئادەملەر رەھىمىسز! ئادەملەر رەھىمسىزلىكى، پەسلىكى بىلەن چىرايلىق، ئاق كۆڭۈللەرنىمۇ ئۆلتۈرىدۇ، دەسسەپ-چەيلەيدۇ…دۇنيانىڭ كۆرۈمسىزلىكى ھەم گۈزەللىكىمۇ ئادەملەر بىلەن ئەسلىدە…
2023.12.28
بەزى ئىشلارنى ئۆزگەرتكىلى بولمايدۇ
قوبۇل قىلىشنىڭ ئۆزى ئاخىرىقى ھېسابتا مۇھەببەتتۇر. ئۆزگەرتىشكە ئۇرۇنماستىن، ئۇنى تىنچ قوغداشمۇ ئادەملەردىكى بىر تۈرلۈك ئەقىل–پاراسەت.
قانچىلىك ئۆزگەرتكىڭىز بولسىمۇ، ئۆزگەرتەلمەيدىغان نەرسلەرنى بەرىبىر ئۆزگەرتەلمەيسىز. بۇنداق چاغلاردا، قوبۇل قىلىش–ئۆزىڭىزگە ئاتا قىلالايدىغان قالتىس سوۋغىڭىزدۇر.
2023.12.29
رەھمەت ئېيتايلى
ئۆزگەرتەلمەيدىغان ئىشلارغا ئۆچ بولۇشنىڭ ئورنىغا ئۇنىڭغا «رەھمەت» ئېيتايلى. شۇنداق، رەھمەت ئېيتساق بولىدۇ.
«ئۆز كۈچۈمگە تايىنىپ قىلالايدىغان ئىشلارنى بىلدۈرگىنىڭىزگە رەھمەت». «مەن ئۈچۈن قىممەتلىك ساۋاق بولغۇدەك كەچۈرمىشلەرنى قالدۇرغىنىڭىزغا رەھمەت». «ماڭا ئۆسۈپ–يېتىلىش پۇرسىتى بەرگەنلىكىڭىزگە رەھمەت».
ئاكتىپ پوزىتسىيە بولغىنىدا، كەچۈرمىشلەرمۇ ئۆزگىرىدۇ.
2023
2023.12.30
نېمىدىن خۇشال بولغان بولسىڭىز، شۇنى قىلىڭ
كۆپ ئويلاپ كەتمەڭ. مەيلى تۇنجى كىچىك قەدىمىڭىز بولسۇن ياكى چوڭ سەكرەش بولسۇن، سىز خۇشاللا بولغان بولسىڭىز، توغرا يۆلىنىشتە ماڭغان بولىسىز. شۇڭا، شۇ يولىڭىزنى داۋاملاشتۇرۇڭ.
2022-يىلىدىكى ئاخىرىقى بەت
2023.12.31
ھاياتىڭىزنى قانداق ياشىماقچى؟
كەلگۈسىدە يۈز بېرىدىغان مۇمكىنچىلىكلەرنى قوبۇل قىلالايدىغان بولۇش ئۈچۈن، سىزگە ئەسقاتمايدىغان ھەر قانداق نەرسىنى تارتىشىپ ئولتۇرماي كەينىگە تاشلىۋىتىڭ. ئەمدى بۇ بىريىلنى ئەسلەپ كۆرەيلى.
بۇ يىل قانداق بىر يىل بولدى؟ بىرەر نەرسە ئۆگىنەلىدىڭىزمۇ؟ سىزنى ئۆزگەرتەلىگۈدەك بىرەر ئىش يۈز بەردىمۇ؟ كېلەر يىلى ئۆزىڭىزنى قانداق تەرەققى قىلدۇرۇشنى ئويلىشىۋاتىسىز؟
يېڭى يىلدا يېتىشكە تېگىشلىك نىشاندىن ئۈچنى بەلگىلەپ بېقىڭ.
تېخىمۇ گۈزەل ياشايلى، خوشە!
ئەسسالام، بىلوگىمنىڭ ئەزىز ئوقۇرمەنلىرى، شۇنداق قىلىپ «ئەمدى كىتاب تەرجىمە قىلمايمەن» دېگەن رەيھان قىز بارمايمەن دېگەن تۈگمەنگە يەنە بېرىپ، يەنە بىلىپ-بىلمەي ئۇشبۇ كىتابنىڭ سىھرى كۈچىگە ئالدىنىپ كەتتى….ھەر كۈنى، ھەر كۈندىكى ئەڭ يارقىن جايدا، ئەڭ ياخشى كەيپىياتتا ھەر كۈنلۈك بەت بىلەن ئۇچىرىشىش كۈنلىرىمگە خۇشاللىق بېغىشلىدى. شۇڭا، كىتابنىڭ ھەر بىر مەزمۇنى شۇ كۈننىڭ بىرەر پارچە خاتىرە سۈرىتى ھەم ئەسلىمىسى سۈپىتىدە كۈندىلىك خاتىرەمنىڭ بىر پارچىسى بولۇپ ماڭدى. مەن« 2023-يىلدا ھاياتىمغا ئارتۇق ئادەم، ئارتۇق ئىشلار، ئارتۇق روھى بىسىملارنى ئارتمايمەن. ئۆزۈمگە، ئائىلەم ۋە بالىلىرىمغا، ھاياتىمدىكى ئەڭ قىممەتلىك كىشىلىرىمگە ۋاقتىمنى، زىھنىمنى بېغىشلايمەن ھەم بۇ بىر يىلدىن ئەڭ يۇقىرى چەكتە خۇشاللىق ھەم ئۆسۈپ-يېتىلگۈدەك پۇرسەتلەرنى ئالىمەن.»دېگەن ۋەدەمگە ئەمەل قىلدىم ھەم شۇنداق ياشىدىم.
سىلەرچۇ؟ قانداق ئىددىيەدە بۇ يىلنى باشلىۋالدىڭلار؟
**************
تەرجىمىدە: رەيھان ئابلەت
مەنبە: A year of positive thingking by Cyndie Spiegel
كىتابنىڭ تولۇق نۇسخسى
http://tokyoxatiriliri.net/?p=10057
http://tokyoxatiriliri.net/?p=10127
http://tokyoxatiriliri.net/?p=10276
http://tokyoxatiriliri.net/?p=10292
http://tokyoxatiriliri.net/?p=10425
http://tokyoxatiriliri.net/?p=10502
http://tokyoxatiriliri.net/?p=10586
http://tokyoxatiriliri.net/?p=10792
http://tokyoxatiriliri.net/?p=10849
http://tokyoxatiriliri.net/?p=9583
http://tokyoxatiriliri.net/?p=9708
http://tokyoxatiriliri.net/?p=9924
ئىنكاس يازىمەن